A cidade da Coruña continúa batendo récords no tráfico de cruceiros, converténdose nun punto de referencia para as navieiras no noroeste peninsular. Este xuño, o porto recibirá dezaseis buques, entre os que destacan tres que visitarán a cidade por primeira vez, dous deles definidos como superiates de ultraluxo.

Os buques Evrima e Ilma forman parte da frota de The Ritz-Carlton Yatch Collection, coñecida por ofrecer unha experiencia de cruceiro exclusiva e personalizada. O Evrima, incorporado en 2022, e o Ilma, en 2024, percorren habitualmente o Mediterráneo no verán e o Caribe e Asia no inverno. Non obstante, este ano, portos como o da Coruña, Turku ou Naxos foron incluídos nos seus itinerarios, priorizando destinos menos saturados.

A primeira escala será a do Evrima o 22 de xuño, un día antes de San Xoán. Este buque de 190 metros de eslora, con capacidade para 300 pasaxeiros, atracará ás 12:00 horas e partirá cara a Bordeos ás 21:00 horas, realizando a escala máis longa da xornada. Ofrece suites con terraza privada, spa, oito cubertas, zona para deportes acuáticos e cinco restaurantes de alta cociña, incluíndo opcións de chefs con Estrela Michelin.

O Ilma chegará o 25 de xuño, o mesmo día que o MS Sirena. Estará na cidade desde as 14:00 horas ata as 23:00 horas. Con 208 metros de eslora e case 500 viaxeiros, tamén se dirixirá a Bordeos. Este superiate conta con 224 suites con ventás de chan a teito e terraza privada. A súa decoración inclúe obras de arte orixinais e ofrece unha piscina infinita, restaurantes internacionais, unha terraza con vistas de 180 graos e unha boutique de Bvlgari.

Ademais, o 19 de xuño, o Viking Mira, con case 1.000 pasaxeiros, fará a súa primeira visita á Coruña. O mes de xuño contará con cinco dobres escalas, os días 2, 3, 14, 19 e 25. O calendario iniciarase o 1 de xuño co Seven Seas Grandeur, que xa visitou a cidade en agosto pasado e é coñecido por albergar obras de arte de recoñecidos artistas e un ovo de Fabergé.