O Servizo Galego de Saúde (Sergas), a través da Consellería de Sanidade, publicou a licitación dunha obra de reforma na instalación térmica do centro de saúde de Matogrande, situado na cidade da Coruña. A actuación, que busca mellorar a eficiencia enerxética e o confort térmico, conta cun orzamento de 217.769 euros.
As empresas interesadas teñen ata o vindeiro 10 de novembro para presentar as súas ofertas. A reforma adaptará a produción enerxética á demanda real, mellorando así a eficiencia das instalacións.
A intervención inclúe o subministro, montaxe, conexión, regulación, proba e posta en servizo de novos equipos e redes. O obxectivo é optimizar o confort nas consultas e zonas comúns, manter a calidade do aire interior e substituír o sistema actual de produción centralizada de auga quente sanitaria por unha solución baseada na aerotermia.
A solución proxectada conservará o sistema de calefacción por solo radiante e integrará a ventilación existente, ao tempo que incorporará a nova produción aerotérmica. O prazo de execución previsto para estas obras é de oito semanas.
