A Consellería do Mar, en colaboración coa Confraría de Pescadores da Coruña, deu un novo paso na recuperación dos bancos marisqueiros da Ría do Burgo. A iniciativa céntrase na introdución de 167.000 exemplares de semente de ameixa xaponesa (Ruditapes philippinarum), como parte dos esforzos para a restauración e conservación dos fondos mariños desta zona.
A semente, que suma un peso total de 59 quilos e unha talla media de 12,5 milímetros, foi producida polo Centro de Investigacións Mariñas de Galicia (CIMA). Posteriormente, foi preengordada no pantalán do Vicedo antes de ser entregada á confraría coruñesa.
Os mariscadores encargáronse de introducir os exemplares en pochóns. Seguidamente, foron colocados en mesas de cultivo situadas no antigo Parque do Estado, concretamente no banco de A Baixada. Alí continuarán o seu desenvolvemento antes de seren plenamente operativos.
Esta acción forma parte dun proxecto máis amplo promovido pola Confraría de Pescadores da Coruña, co obxectivo de revitalizar e manter a saúde dos ecosistemas submareais da Ría do Burgo.
