A partir das 9.00 horas deste venres 21 de agosto, a pasarela peonil que conecta as estacións de tren e autobús sobre a avenida Alfonso Molina na Coruña estará completamente operativa. A apertura das dúas ramplas que aínda permanecían pechadas cara á rúa Marqués Figueroa e a ronda das Estacións permitirá recuperar un percorrido esencial para a mobilidade peonil entre barrios divididos pola principal avenida da cidade.
O concelleiro de Infraestruturas, Jesús Celemín, destacou a importancia desta reapertura. "Coa apertura das dúas ramplas completamos unha actuación moi necesaria nun punto clave para a mobilidade peonil da cidade, permitindo que desde este venres a cidadanía poida volver utilizar a pasarela na súa totalidade, cunha estrutura renovada, máis segura e accesible", sinalou.
Durante as obras, iniciadas en marzo, instalouse unha pasarela provisional en paralelo á orixinal. Esta estrutura provisional estivo aberta durante varias semanas mentres se completaba a instalación da nova pasarela, que inicialmente só tiña unha das tres saídas cara a Os Mallos operativa.
A pasarela orixinal presentaba "danos estruturais", segundo un informe de Cimarq, consultora de enxeñaría, realizado en febreiro de 2023. O documento sinalaba "abundante corrosión" na zona central, rampas e descansillos, así como "roturas, oxidación e perdas de espesor" nas chapas de forxado colaborante. Tamén se detectou "rotura do formigón con desprendemento de cascotes" no pavimento do vano central.
Desde marzo, o Concello traballou na substitución da estrutura por unha nova e similar. As obras implicaron diversos cortes na avenida Alfonso Molina, sempre en horario nocturno, para minimizar o impacto no tráfico.
