A resolución, emitida pola Dirección Xeral de Calidade Ambiental e Sostibilidade, culmina o procedemento de tramitación ambiental da iniciativa. A Consellería de Medio Ambiente e Cambio Climático deu por rematado este proceso, que incluíu unha Declaración de Impacto Ambiental (DIA) favorable, condicionada ao cumprimento das esixencias ambientais e de vixilancia.
Tras as consultas realizadas durante a fase de participación pública, os organismos consultados consideraron que o proxecto non xerará impactos significativos nos distintos eidos analizados. A súa posta en marcha é viable sempre que se cumpran as condicións establecidas en relación á protección da atmosfera, augas, solo, xestión de residuos e integración paisaxística, entre outros aspectos.
Actualmente, a planta de Profand Cambre no polígono industrial de Espíritu Santo ten unha capacidade de produción inferior ás 75 toneladas diarias de produto acabado. Co novo proxecto, a capacidade de produción de produtos acabados incrementarase ata as 218,2 toneladas diarias.
Para lograr este incremento, a empresa prevé realizar modificacións no proceso actual, incluíndo o desmantelamento de parte dos equipos, a instalación de novas liñas de envasado e a redistribución dos usos das salas.
