Todas as persoas empadroadas na cidade con 16 anos cumpridos poderán elixir entre as 100 propostas que superaron o filtrado técnico e económico. Esta edición presenta a cifra máis alta de propostas nas últimas convocatorias.
As 100 propostas suman un investimento estimado de 12,6 millóns de euros, superando case cinco veces a dotación dispoñible. O 80 % (2.080.000 euros) destinarase a actuacións por distritos, mentres que o 20 % restante (520.000 euros) será para propostas de ámbito de cidade.
Das máis de 400 iniciativas presentadas, chegaron á votación 80 propostas de distrito e 20 de ámbito de cidade. Os distritos 7 (Os Castros e Elviña), 9 (Mesoiro e Castro de Elviña) e 5 (Riazor, Labañou e Os Rosales) concentran o maior número de propostas.
A alcaldesa, Inés Rey, animou á cidadanía a participar, destacando que os Orzamentos Participativos permiten á veciñanza ter voz directa na definición das prioridades da cidade e contribuír a unha Coruña máis próxima e pensada desde os barrios.
A votación realízase en liña a través de [nacorunacontas.coruna.gal](https://nacorunacontas.coruna.gal/), onde cada persoa pode apoiar propostas de cidade e de ata tres distritos. A plataforma mostrará o custo acumulado das seleccións e permitirá modificar a escolla ata o peche.
Para facilitar a participación presencial, o Concello habilitará dez postos itinerantes en diferentes barrios entre o 21 de xullo e o 31 de agosto, con persoal de apoio para informar e axudar no proceso.
Os resultados publicaranse tras o peche da votación e as actuacións seleccionadas incorporaranse ao orzamento municipal para a súa execución entre novembro de 2026 e decembro de 2028.
