A Fiscalía solicita sete anos e seis meses de prisión para o principal acusado de asestar 12 puñaladas a outro home na Coruña, ademais de dous anos por tenza de arma prohibida. Os feitos ocorreron tras unha noite de consumo de alcohol e drogas.
O autor confeso das puñaladas declarou no xuízo que "estaba a consumir de todo" e que non se recoñecía a si mesmo. "Non era eu", afirmou, explicando que se atopa en tratamento psiquiátrico crónico dende os 18 anos e que no momento dos feitos atravesaba unha "mala tempada".
“"Eu esa navalla non a levaba enriba, alguén me deu unha chaqueta que estaba na barra do bar e nesa chaqueta había unha navalla."
O acusado amosouse arrepentido e quixo pedir "perdón á vítima e á miña familia". Tamén declararon os outros tres procesados, que recoñeceron o consumo de estupefacientes e alcohol e amosaron o seu pesar. A Fiscalía reclama para eles catro anos e seis meses de prisión por un delito de lesións agravadas, e seis meses máis para un deles por resistencia á autoridade.
Para tentar reparar "a dano causado", tres dos acusados consignaron máis de 10.000 euros en concepto de indemnización á vítima antes da vista oral.
A vítima relatou que a agresión comezou cun forcexo e que recibiu "un golpe por detrás" e unha "patada na cara" que o deixaron conmocionado. Asegurou non ser consciente de ser apuñalado ata que o médico de urxencias lle informou. As secuelas inclúen "cicatrices" e perda de "sensibilidade no lado esquerdo da cara".
O Ministerio Público sostén que na madrugada do 19 de abril de 2024, os acusados propináronlle varias patadas e puñetazos mentres a vítima estaba indefensa no chan. Un deles cravoulle a navalla en 12 ocasións coa "intención de acabar coa vida" do home.
