O executivo liderado por Ángel García Seoane subliña que esta petición, que busca cubrir as franxas horarias de maior afluencia de estudantes e persoal, non foi atendida pola administración autonómica. A pesar das declaracións da directora xeral de Mobilidade no Parlamento de Galicia, o goberno local de Oleiros asegura que a Xunta volveu desestimar a proposta.
“"Arteixo, Culleredo e parte de Cambre si teñen bus á Universidade cunha frecuencia dunha hora. Xa que a directora xeral de Mobilidade non foi capaz de explicar esta arbitrariedade na reunión celebrada o pasado martes, debería pronunciarse publicamente sobre por que uns municipios si e outros non, cando só no Concello de Oleiros hai máis de 800 potenciais usuarios entre estudantes, profesorado e funcionariado."
O alcalde de Oleiros tamén cualificou de “falso” que a Xunta “asuma e atenda as demandas dos concellos”, argumentando que ningunha das solicitudes formuladas polo seu municipio foi considerada. Considera un “insulto á cidadanía” que se xustifique a atención ás demandas baseándose en cinco frecuencias diarias para Xaz e dous buses adicionais á praia de Mera durante o verán.
Pola súa banda, a directora xeral de Mobilidade, Judit Fontela, afirmou no Parlamento que o seu equipo está a estudar novas propostas para mellorar a oferta no corredor coa cidade da Coruña. Entre estas melloras, mencionou as conexións coa Universidade e con polígonos industriais como o de Iñás, situado en Oleiros.
