A campaña de concienciación sobre a reciclaxe de envases lixeiros, impulsada pola Xunta de Galicia e Ecoembes, fixo parada este xoves en Oleiros (A Coruña). A iniciativa, que se desenvolve en 15 concellos da provincia, ten como obxectivo principal reducir a presenza de refugallos impropios no contedor amarelo mediante accións visuais e participativas nas rúas, comercios e praias.
A conselleira de Medio Ambiente, Ángeles Vázquez, e o representante de Ecoembes en Galicia, Bruno de Llano, participaron nunha das actividades da campaña "Impropio de nós" na praia de Bastiagueiro. Tamén estivo presente o alcalde, Ángel García Seoane.
"Se queremos ter os espazos limpos, no verán non nos podemos relaxar. Multiplicar as persoas que veñen aos lugares supón ter moito máis traballo, pero tamén moitísimo máis lixo", declarou Ángeles Vázquez, quen destacou que a taxa de reciclaxe en Galicia mellorou 10 puntos, pasando dun 10% a un 20%, e a recollida selectiva a nivel estatal subiu do 16% ao 24%.
A campaña, que comezou en Lousame o pasado 26 de xuño e rematará o 28 de agosto en Gandarío, prevé chegar a máis de 225.000 persoas nos concellos da Mancomunidade Serra do Barbanza e o Consorcio das Mariñas. A iniciativa inclúe a instalación de elementos impropios no contedor amarelo e o reparto de flores amarelas con bicicletas rotuladas. Nas praias, realízase un xogo de pesca de refugallos.
Por outra banda, a conselleira anunciou que o convenio para a continuidade do Centro de Extensión Universitaria e Divulgación Ambiental (Ceida) no Castelo de Santa Cruz, en Oleiros, se asinará despois de agosto, unha vez listos os informes pertinentes.
