A competición, organizada pola Federación de Salvamento e Socorrismo de Galicia (FESSGA) co apoio do Concello da Coruña, a Deputación da Coruña e a Xunta de Galicia, contará coa participación de máis de 300 deportistas procedentes de 14 clubs diferentes.
O programa deportivo inclúe os campionatos absolutos, xuvenís, júnior, cadetes e infantís. Estas probas, que foron reprogramadas tras a súa suspensión inicial por causas meteorolóxicas, poñerán a proba a resistencia, velocidade e destreza técnica dos participantes en disciplinas como a natación, o rescate con táboa e as carreiras sobre area.
A celebración do II Aberto de Praia permitirá a presenza de competidores doutras comunidades autónomas, elevando o nivel técnico da cita. O evento poderá seguirse en directo a través da canle oficial de YouTube da federación autonómica.
O acceso ao areal será libre e gratuíto para o público durante toda a fin de semana. A organización traballa coa administración local para garantir que o desenvolvemento das probas sexa compatible co uso habitual da praia por parte da cidadanía.
