A cidade da Coruña acollerá as derradeiras funcións do musical Mamma Mia!, que se despedirá dos escenarios españois tras unha exitosa xira de dous anos. As representacións terán lugar no Palacio da Ópera dende o 16 ata o 26 de xullo.

Esta nova produción, dirixida por Juan Carlos Fisher, chega á cidade herculina despois de tres tempadas no Teatro Rialto de Madrid e de percorrer gran parte do país. A montaxe destaca pola súa escenografía, vestiario e coreografías orixinais, construídas arredor das icónicas cancións do grupo sueco ABBA.

Os 27 integrantes do elenco contarán a historia de Donna e Sophie, acompañados polos grandes éxitos da banda. Os prezos das entradas, xa á venda en Ataquilla, oscilan entre os 42,90 e os 75,90 euros por persoa.