Durante anos, o anterior executivo de Unión por Cambre xustificou a situación do Concello, especialmente os problemas para o abono de facturas, aludindo a un "bloqueo administrativo". Esta interpretación mantívose mesmo tras a dimisión do entón alcalde, Óscar García Patiño, en marzo de 2024, e durante a posterior substitución na Alcaldía.
Con todo, o actual Goberno municipal asegura que a documentación técnica desmente esta versión. Segundo explicou a rexedora, o que houbo foi un "colapso, non un bloqueo", atribuíndo a situación a deficiencias acumuladas como a falta de previsión, a non cobertura de prazas clave e a ausencia de reposición do persoal necesario para o funcionamento ordinario da administración local.
“"Aquí o que houbo foi un colapso, non un bloqueo."
Diana Piñeiro subliña que estas carencias son consecuencia de anos de "falta de planificación", sen que se impulsasen os procedementos necesarios para garantir a estrutura administrativa do Concello de Cambre. A xuízo da rexedora local, esta dinámica derivou nun colapso do funcionamento municipal.
O Executivo local insiste en que a prioridade actual é unha "regularización profunda da estrutura contractual e administrativa do Concello", co obxectivo de "recuperar a normalidade institucional, garantir a legalidade e asegurar o correcto funcionamento dos servizos públicos".
