O conxunto coruñés, a pesar de mostrar vontade e aguantar o ritmo nos compases iniciais, non puido contrarrestar a superioridade física e a potencia do equipo local, o Colina Clínic El Salvador. A pesar da contundente derrota, o CRAT pecha a tempada entre os mellores equipos de España.

O partido comezou cun intercambio de golpes. Bingbing Vergara adiantou pronto ao Salvador cunha veloz carreira e a súa propia transformación (7-0). Non tardou en reaccionar o CRAT, que grazas a unha xogada colectiva culminada por Chía Alfaro, que tamén transformou, logrou o empate (7-7). Porén, o Salvador volveu tomar a dianteira cun ensaio de Matilda Toca, ampliado por Vergara (14-7).

Tras un inicio frenético, o ritmo do xogo baixou. O CRAT centrou os seus esforzos na defensa e o roubo de balón, pero a falta de precisión nos pases impediu xerar xogadas de perigo. Os erros nas melés coruñesas permitiron ao Salvador, gran favorito ao título, ampliar a vantaxe antes do descanso. Ensaio de María Miguel, Carla Villegas e Kiara Espósito deixaron o marcador en 31-7 ao final da primeira metade.

A segunda parte mantivo a tónica. Sidorela Bracic anotou o primeiro ensaio tras o paso polos vestiarios (36-7). Fronte á mellor dianteira do país, o CRAT viuse impotente e centrouse en defender. Tecla Masoko sumou outro ensaio para o Salvador, mentres Vergara continuaba sumando transformacións e ensaios, elevando a puntuación ata o 57-7.

Coa final asegurada, o Salvador realizou cambios, pero Bingbing Vergara seguiu sumando puntos. O resultado final foi de 71-7, un duro correctivo para o equipo coruñés que agora espera á próxima tempada tras un curso esixente.