O Concello da Coruña sacou a licitación varias obras na urbanización O Carón. O proxecto, acordado cos residentes e con financiamento privado, permitirá poñer fin a unha urbanización que quedou inacabada durante anos. As actuacións inclúen a revisión e reposición de todos os equipamentos urbanos, reforzos de accesibilidade e sinalización, e outras intervencións necesarias para completar a urbanización.
Ao remate destes traballos, o Concello poderá recibir os viais e espazos públicos para facerse cargo da súa conservación e mantemento. A alcaldesa, Inés Rey, subliñou que "imos completar un proceso que levaba anos parado e que permitirá que todo ese viario pase a ser patrimonio municipal, co que isto supón para as persoas residentes, que xa non terán que facerse cargo dos gastos de mantemento dos viais".
A reforma beneficiará ao grupo de vivendas situado entre a avenida de Nova York e a estrada do Club de Golf. Incluirá a posta a punto das beirarrúas, liñas de estacionamento e outras reparacións puntuais. No interior das áreas residenciais, completarase un novo vial de acceso peonil con entrada permitida para os veciños, dotado de saneamento, iluminación, electricidade, gas e telecomunicacións.
Ademais, executaranse renovacións de pavimentos en beirarrúas e calzadas, reforzo de redes de servizo, ampliación e modernización de equipamentos e mobiliario urbano, e inspeccións para detectar reparacións necesarias. Alredor da pista polideportiva, colocarase un novo valado para protexer un desnivel existente e renovarase a zona do muro.
