O Centro de Investigación en Tecnologías de la Información y las Comunicaciones (CITIC) da Universidade da Coruña (UDC) colaborou na organización da décima edición do Workshop on Online Abuse and Harms (WOAH). O evento tivo lugar en Budapest, Hungría, o pasado 29 de outubro, no marco da conferencia internacional EMNLP 2026, especializada en Procesamento do Linguaxe Natural. A investigadora do CITIC Paloma Piot formou parte do comité organizador.
O WOAH é un foro científico de referencia para a comunidade investigadora que estuda e detecta diversas formas de abuso e contidos prexudiciais en internet, como o discurso de odio, o acoso e a desinformación. Nesta edición, presentáronse 77 traballos na modalidade archival e 6 na non-archival, procedentes de 20 países, cunhas taxas de aceptación do 51% e 86% respectivamente.
O programa contou con catro conferencias maxistrais impartidas por recoñecidos especialistas internacionais, entre eles Sara Tonelli (Fondazione Bruno Kessler), Zeerak Talat (Universidade de Edimburgo), Su Lin Blodgett (Mila – Quebec AI Institute) e Sarah T. Roberts (Universidade de California en Los Ángeles).
Durante a EMNLP 2026, Paloma Piot presentou a investigación “From Self to Other: Evaluating Demographic Perspective-Taking in LLM Hate Speech Annotation”, que analiza se os modelos de linguaxe de gran tamaño (LLM) poden percibir diferenzas na detección de contidos de odio segundo o perfil demográfico simulado. O obxectivo é mellorar a fiabilidade dos sistemas de anotación automática.
Tamén se presentou o traballo “Beyond the Explicit: A Bilingual Dataset for Dehumanization Detection in Social Media”, desenvolvido en colaboración co centro GESIS (Colonia, Alemaña) e a Universidade de Michigan. Esta investigación céntrase na detección automática de linguaxe deshumanizadora en redes sociais mediante un conxunto de datos bilingüe (inglés e alemán).
A organización do WOAH confirmou a continuidade do encontro para 2027, cando a súa undécima edición se celebrará en Kioto (Xapón), en colaboración con ACL 2027, outra importante conferencia internacional de Procesamento do Linguaxe Natural. O obxectivo é seguir promovendo a colaboración e o intercambio de avances na prevención do abuso en internet.
