A remodelación dos Cantóns na Coruña avanza coa incorporación de novos elementos vexetais. Este mércores, seis sobreiras foron plantadas nas inmediacións do Teatro Colón. Nos vindeiros días, o Concello engadirá catro faias xunto ao Obelisco, que se sumarán ao metrosidero xa trasladado en novembro.
“"Aínda queda moito por facer pero xa comeza a verse ese proxecto co que queremos facer máis amable unha das zonas máis importantes e emblemáticas da cidade."
Segundo informou o Concello nunha nota de prensa, o proxecto de remodelación dos Cantóns ten como obxectivo principal a renaturalización do espazo e a ampliación da presenza de elementos naturais. Ademais destas plantacións, prevese a instalación dunha xardineira con árbore fronte á Fundación Barrié e a plantación de catro carpes na rúa Santa Catalina.
Os traballos tamén se estenderon á zona de Entrexardíns, onde se iniciaron as obras este luns para crear un novo corredor peonil verde, unindo as dúas metades dos xardíns de Méndez Núñez. Como consecuencia desta intervención, a parada de autobús metropolitano foi trasladada á rúa Alcalde Manuel Casás.
