A programación das Festas de María Pita 2026 inclúe un dos eventos máis esperados: Los40 Summer Live 2026. A partir das 22.00 horas, a praza de María Pita converterase no epicentro dunha gran xira musical gratuíta do verán que fai parada na Coruña.
O cartel está composto por artistas destacados do pop e da música urbana actual, como Depol, Lola Tuduri, Enol, La Beba, Cesar AC, Adexe y Nau, AWY, Chiara Oliver, Pikete, Daniela Blasco e Chema Rivas. A festa estará conducida polo DJ de Los40, David Álvarez.
O concelleiro de Cultura e Turismo, Gonzalo Castro, destacou que esta iniciativa se alinea coa aposta do Goberno de Inés Rey por unha programación diversa que conecte coa mocidade e poña á Coruña no mapa das xiras musicais gratuítas máis importantes de España.
A cita reunirá voces emerxentes como Depol, referente do novo pop español, e Chiara Oliver, unha das artistas con maior proxección saída de Operación Triunfo. Tamén participarán Enol, representante da escena pop urbana; Lola Tuduri, promesa do pop; e La Beba, con influencias de pop e electrónica.
A vertente máis festiva correrá a cargo de Chema Rivas, Cesar AC e Daniela Blasco, con ritmos urbanos e influencias latinas. O dúo canario Adexe y Nau, moi popular nas plataformas dixitais, tamén actuará, xunto coa representación local da banda coruñesa AWY e Pikete, da nova escena urbana galega.
