A rede de Bibliotecas Municipais da Coruña abrirá o vindeiro 14 de setembro o prazo de inscrición para participar nos seus clubs de lectura, que este novo curso contarán cunha programación variada en temática e dirixida a diferentes franxas de idade. O prazo permanecerá aberto durante 10 días, ata o 24 de setembro.
O Concello destaca a importancia deste servizo para o desenvolvemento cultural e a socialización da cidadanía, ofrecendo "espazos amigables e próximos onde poidan encontrarse con outras persoas aficionadas á lectura, é comnpartir gustos e experiencias", segundo sinalou o concelleiro de Cultura e Turismo, Gonzalo Castro. A difusión da cultura pública e gratuíta é unha das liñas estratéxicas establecidas polo goberno municipal.
A oferta deste ano inclúe 30 clubs de lectura, dos cales 29 serán presenciais e un virtual. Entre as propostas atópanse 3 dedicados á filosofía, 2 ao cómic, 1 á lectura de clásicos, un club en galego, outro de lectura en voz alta e un novo club centrado na temática medioambiental.
En canto ás franxas de idade, haberá 26 clubs para público adulto, 2 para a mocidade e 2 para o público infantil. Os clubs estarán coordinados por persoal bibliotecario para favorecer a participación e o intercambio de opinións.
Ademais, o club de lectura LGTBIQ+, Queeruña, abrirá a súa inscrición en decembro con 60 prazas. Este club, pioneiro en Galicia na súa temática, naceu no ano 2016.
As actividades comezarán en outubro, agás o club Queeruña. Os participantes poderán elixir entre diferentes ritmos de encontro, xa que os clubs terán periodicidade semanal, quincenal ou mensual. Para participar, é preciso facer unha inscrición previa, que se pode realizar presencialmente nas bibliotecas, a través da web municipal ou por teléfono. En total, ofertaranse ao redor de 480 prazas de participación e préstamo de libros gratuíto.
