As festas do barrio de Os Rosales, na Coruña, terán lugar este fin de semana, concretamente os días 29 e 30 de maio. O programa deseñado polo Concello inclúe unha ampla oferta de música, deporte e lecer para todas as idades, ademais dunha carpa gastronómica con pulpo e churrasco e un food truck.

O epicentro das celebracións será a praza Elíptica. Alí, o venres ás 21.00 horas, terá lugar o pregón inaugural a cargo do humorista David Perdomo e da compañía Teatro EPG. A continuación, a partir das 22.00 horas, actuarán a banda coruñesa AWY e o grupo indie Alga.

A xornada do sábado comezará ás 11.00 horas con xogos populares e actividades infantís. Paralelamente, na zona do Calaparc, haberá un combate de láser tag e unha clase maxistral de esgrima antiga impartida pola Escola da Espada. A sesión vermú estará amenizada polo grupo Son d'aquí a partir das 12.00 horas, seguida da actuación de Andrés Solórzano ás 13.00 horas. Pola tarde, Oxio Zero ofrecerá unha master class deportiva e, dende as 19.00 horas, o escenario acollerá a Adagio Cantabile, a Banda de Betanzos, Zumba é Vibrato Crew e a orquestra Horizon The Show.

O domingo 31, día de clausura, as actividades comezarán ás 11.00 horas cun mercadillo organizado pola Asociación Empresarial los Rosales. Ás 12.00 horas sairá a procesión dende a igrexa de Nosa Señora dos Rosales, acompañada por Cantigas da Terra. A sesión vermú de despedida correrá a cargo do grupo The Cruze a partir das 13.00 horas.