A Consellería de Vivenda da Xunta de Galicia levará a cabo o próximo 9 de setembro o sorteo de 50 vivendas de promoción pública destinadas a aluguer accesible. Estas vivendas atópanse na parcela Z-38, situada no barrio de Xuxán, na cidade da Coruña.
Do total de vivendas, 19 (o 40%) reservaranse especificamente para adxudicatarios menores de 36 anos, co obxectivo de facilitar o acceso á vivenda a este sector da poboación.
O procedemento de adxudicación, cuxo anuncio se publicou este martes no Diario Oficial de Galicia, establece os requisitos necesarios para participar no sorteo. As vivendas sortearanse ante notario entre as persoas inscritas no Rexistro de Demandantes de Vivenda para o concello da Coruña, que figura como municipio preferente.
Entre os requisitos principais, os solicitantes deberán residir ou traballar no concello da Coruña. Ademais, terán que acreditar ingresos ponderados por unidade familiar ou convivencial que oscilen entre 0,7 e 4 veces o índice público de renda de efectos múltiples (Iprem), ou ata 4,5 veces no caso de familias numerosas.
