Os videoxogos premiados foron desenvolvidos por mozos e mozas da Coruña, Cuntis e Campo Lameiro. O primeiro premio foi para 'Inspector Sommers in: Ourobori an Madness', un equipo da Coruña que busca crear unha historia e mecánicas innovadoras ambientadas na Guerra Fría con viaxes no tempo e solución de crebacabezas.
O segundo galardón recaeu en 'Depths’Tale', de Alexandre Gosende e equipo de Cuntis. Este videoxogo céntrase nas pericias dun pescador solitario en mar aberto, destacando pola súa música, deseño sonoro e ambientación visual.
O terceiro premio foi para 'Chroma Tales', de Silvia Fernández e equipo de Campo Lameiro. A proposta presenta a historia dun mago que repara vidreiras, valorada polo xurado pola súa calma e experiencia de xogo.
A modalidade de creación de videoxogos é unha das 15 especialidades do Xuventude Crea 2026, que este ano conta con preto de medio milleiro de inscritos. A iniciativa, que chega á súa décimo sétima edición, xa tivo a participación de preto de 6.000 mozos e mozas, con 4.000 obras e proxectos creativos e repartiu preto de 700 premios.
