O Goberno galego remitiu a finais de maio a acta de recepción das obras e o borrador da acta de entrega para a súa revisión por parte de Adif. Transcorridos máis de tres meses sen recibir resposta nin observacións, a formalización da acta de entrega permanece pendente.
A Dirección Xeral de Mobilidade da Xunta reiterou por escrito a solicitude a Adif para que revise a documentación e comunique canto antes a súa conformidade ou as modificacións oportunas, co obxectivo de completar este trámite administrativo.
Segundo o convenio de colaboración asinado pola Xunta, Adif e o Concello da Coruña, unha vez recibidas as obras pola Xunta, esta debe comunicalo ás outras partes e formalizar a súa entrega mediante a correspondente acta. Posteriormente, Adif asumirá a xestión, conservación e mantemento da parte das instalacións que lle correspondan.
A Xunta lembra que finalizou en prazo as actuacións que lle correspondían, incluíndo a nova estación de autobuses, o aparcadoiro de vehículos e os elementos comúns entre as estacións de autobuses e a ferroviaria. Estas obras implicaron un investimento autonómico superior aos 20 millóns de euros.
A remodelación da estación ferroviaria é competencia de Adif, mentres que os accesos polas avenidas da Sardiñeira e do Ferrocarril son responsabilidade do Concello da Coruña.
A nova terminal de autobuses conta con 20 dársenas de operación e 23 de regulación, e o aparcadoiro dispón de máis de 560 prazas. As actuacións da Xunta suman máis de 29.600 metros cadrados de superficie útil, incluíndo un edificio de viaxeiros de 1.800 metros cadrados.
Estas obras forman parte da creación da área intermodal da Coruña-San Cristovo, deseñada para integrar diferentes modos de transporte e mellorar a conectividade e mobilidade. O proxecto está financiado con fondos Next Generation EU, no marco do Plan de Recuperación, Transformación e Resiliencia.
