A convocatoria, que se enmarca na segunda fase do Plan Mineiro de Galicia, pon a disposición das empresas unha superficie total de 200.244 hectáreas. Do total de dereitos, 126 están destinados á investigación de novos recursos, mentres que 27 corresponden a xacementos con reservas xa acreditadas.
Un dos eixes centrais desta licitación é a esixencia de plans sociais e compromisos de impacto positivo no contorno. Nas concesións de maior interese, o 65% da valoración das propostas dependerá de factores socioeconómicos e ambientais, superando o peso dos criterios estritamente técnicos.
As 27 concesións de explotación sitúanse integramente na provincia da Coruña. Concretamente, os dereitos distribúense entre San Fins, para volframio e estaño; Santa Comba; Corcoesto, para ouro; e Mesía, para caolín, cuarzo e arxila.
A administración autonómica subliña que a investigación non garante a apertura dunha mina, senón que é un paso previo para avaliar a viabilidade dos recursos. As empresas interesadas poderán presentar as súas solicitudes durante os dous meses seguintes á publicación da convocatoria no Boletín Oficial do Estado.
