A capacidade de loita e o optimismo da nova surfista de San Sadurniño, Candela Pérez Dopico, demostráronse unha vez máis, esta vez fóra do mar. Tras máis de tres meses no Hospital Teresa Herrera-Materno Infantil da Coruña, Candelita recibiu a alta médica e puido reunirse coa súa familia: o seu pai, a súa nai e a súa irmá pequena.
A deportista, que sufriu un accidente de tráfico cando se dirixía a adestrar ao seu lugar favorito, Pantín, xa amosaba a súa enerxía ao saír do hospital, facendo uso do seu surfskate. "Está a full", sinalou o seu pai, Sergio, destacando as ganas de traballar da nova deportista.
“"Grazas a todo o persoal do hospital. En momentos así un entende de verdade a importancia da sanidade pública, porque cando a vida se rompe, aparece un exército de profesionais que loita contigo sen preguntar quen es, de onde veñes ou canto tes. Levamos moito máis que unha alta médica. Grazas por coidar á nosa Candelita."
A familia de Candela Pérez quixo agradecer publicamente o labor do persoal sanitario, destacando a importancia da sanidade pública. Agora, iníciase unha nova etapa centrada na rehabilitación para mellorar os seus movementos, sendo xa practicamente autosuficiente. O seu pai, Sergio Pérez, sinala que "agora a remar con ela" e que volven estar os catro xuntos.
Ademais da rehabilitación diaria na Coruña, a deportista colaborará coa Fundación Adcai, que apoia a nenos e nenas con dano cerebral adquirido. Un dos obxectivos marcados por Candela é volver a estar sobre a súa táboa de surf, un reto que o seu pai ve con optimismo, recoñecendo a súa capacidade de campiona dentro e fóra da auga.
