A Orquestra Gaos presentou a súa 18ª tempada musical, unha programación que combina obras do repertorio clásico, propostas divulgativas e apoio a novos intérpretes. O Concello da Coruña colabora un ano máis coa formación, reafirmando o seu apoio á programación musical estable e ao dinamismo cultural da cidade.
A principal novidade da tempada son os Concertos contados, un formato onde a pianista e divulgadora Andrea Vilar guiará ao público na escoita das obras, achegando contexto histórico, claves de interpretación e conexións con outras disciplinas artísticas.
O concelleiro de Cultura e Turismo, Gonzalo Castro, destacou a importancia da traxectoria da orquestra, sinalando que "A Orquesta Gaos é unha das grandes embaixadoras culturais da Coruña e un exemplo de como a música clásica pode chegar a públicos diversos sen renunciar á excelencia artística".
A programación inclúe varias actuacións na Coruña, con presenza destacada no Teatro Colón. O 28 de febreiro de 2027 celebrarase Novos intérpretes, un concerto protagonizado polos gañadores do primeiro concurso de novos solistas da orquestra.
Os días 17, 18, 24 e 25 de abril de 2027, a orquestra realizará a xira galega da 'Novena Sinfonía' de Beethoven, coincidindo co bicentenario da morte do compositor. O concerto na Coruña será o 18 de abril no Teatro Colón, reunindo á Orquesta Gaos, ao Coro Gaos e aos solistas Ruth Terán, Julia Merino, Pancho Corujo e Borja Quiza.
A tempada concluirá en xuño co concerto 'Diálogos con Abe Rábade' o 27 de xuño no Teatro Colón, un encontro co recoñecido pianista galego que explorará repertorios inspirados na música americana e noutras linguaxes afastadas do ámbito sinfónico.
Entre as novidades tamén se atopa a creación do I Concurso Orquesta Gaos de novos solistas, dirixido a intérpretes de ata 18 anos. A fase final terá lugar na Coruña o 28 de novembro, e os gañadores actuarán como solistas coa formación e realizarán unha gravación profesional. Castro subliñou que esta iniciativa "reforza unhas das grandes fortalezas da Orquesta Gaos, que é o seu compromiso coa formación e coa promoción do talento musical emerxente de Galicia".
Fundada en 2009, a Orquesta Gaos ten realizado máis dun centenar de concertos e congrega cada tempada arredor de 20.000 espectadores, ademais de manter unha intensa actividade de formación e divulgación musical.
