A deputada provincial de Vías e Obras, Mónica Rodríguez, mantivo unha reunión coa alcaldesa de Bergondo, Alejandra Pérez Máquez, e o primeiro tenente de alcalde, Juan Fariña, para analizar o estado do proxecto que busca mellorar a seguridade na estrada DP-0810, concretamente no tramo da finca Villa Julia.
Tras obter o informe favorable da Dirección Xeral de Patrimonio Cultural da Xunta de Galicia, o seguinte paso crucial é conseguir a luz verde do Adif, xa que os traballos proxectados afectan á zona da vía do tren. A necesidade desta autorización foi comunicada polo equipo redactor do proxecto durante o encontro celebrado no pazo provincial.
“"O proxecto avanzou sempre con pasos firmes, desde que coñecemos o visto bo de Patrimonio nunca deixamos de traballar para poder executalo o antes posible, somos conscientes de que é un problema de seguridade gravísimo que arrastramos desde hai moitos anos. Ao igual que fixemos no seu momento con Patrimonio, pedimos ao Adif que desbloquee este asunto con urxencia, a seguridade ten que ser unha prioridade."
Mónica Rodríguez tamén quixo agradecer a paciencia da veciñanza e salientou que o proxecto se executará respectando o patrimonio, pero priorizando a protección da vida das persoas que transitan pola vía.
O tramo en cuestión, entre os puntos quilométricos 4+250 e 4+440 da DP-0810, caracterízase por un ancho de calzada reducido, curvas pechadas, escasa visibilidade e falta de espazo peonil, a pesar do elevado tráfico e a presenza de numerosas vivendas na zona.
