A achega provincial destinarase a cofinanciar a produción da ópera Jenůfa, de Leoš Janáček, que se representou o pasado setembro no Palacio da Ópera. Esta produción marcou a estrea absoluta da obra en Galicia e a súa cuarta representación en España.
A posta en escena contou coa dirección musical de José Miguel Pérez-Sierra á fronte da Orquestra Sinfónica de Galicia, a dirección escénica de Emiliano Suárez e a participación do Coro Gaos. O elenco estivo encabezado por Vanessa Goikoetxea, Eliska Weissova, Alejandro Roy e Joan Lainez.
A sinatura deste convenio coincide coa actual programación de Tosca, que regresou á tempada coruñesa tras 22 anos e terá unha segunda función mañá, sábado 24 de outubro. A obra de Puccini reúne a Miren Urbieta-Vega, Ragaa Eldin e Carlos Álvarez, baixo a dirección musical de Oliver Díaz.
Este acordo dá continuidade ao apoio da Deputación a Amigos da Ópera, entidade fundada en 1952 e decana das asociacións operísticas españolas. A colaboración contribúe a manter unha programación que amplía a oferta cultural da Coruña e impulsa o traballo dos profesionais do sector.
