A proposta académica busca responder á crecente necesidade de profesionais especializados no desenvolvemento de modelos de intelixencia artificial que sexan máis eficientes tanto a nivel enerxético como computacional. O programa está deseñado para estudantes, titulados e perfís profesionais que queiran actualizar as súas competencias nun sector estratéxico.
A oferta formativa estrutúrase en tres eixes principais. O Curso de Experto en IA e Algoritmos Verdes, de 25 créditos ECTS, impartirase de xeito presencial entre outubro de 2026 e febreiro de 2027. Paralelamente, ofrécense dúas microcredenciais de 6 créditos cada unha: unha sobre aplicacións prácticas, en formato virtual entre novembro e decembro, e outra sobre deseño e implementación, en modalidade híbrida entre setembro e outubro.
Os interesados teñen de prazo ata este venres, 10 de xullo, para formalizar a preinscrición no curso de experto e na microcredencial de aplicacións prácticas. Para a microcredencial centrada no deseño e implementación, o período de solicitude estenderase ata o vindeiro 15 de xullo.
