Tras o éxito da representación na Semana Clásica das Festas de María Pita 2025, a Banda Municipal da Coruña (BMMC) e Cántigas da Terra colaboran de novo nesta produción que promove o Concello. A alcaldesa destacou o valor da iniciativa para recuperar a memoria das traballadoras da Fábrica de Tabacos da Palloza e a revolta de 1857, considerada unha das primeiras loitas sindicais lideradas por mulleres en Europa.
"As Cigarreiras é un exemplo extraordinario de como a cultura nos permite recuperar a nosa historia e dar voz ás mulleres que contribuíron a construír a Coruña que hoxe coñecemos", sinalou Rey, engadindo que o espectáculo "emociona, reivindica a nosa memoria colectiva e proxecta a nosa identidade cultural cara ao futuro".
Rey tamén puxo en valor a colaboración entre a Banda Municipal, "institución cultural imprescindible que contribúe a democratizar o acceso á cultura", e Cántigas da Terra, "un referente cultural non só da Coruña senón de toda Galicia" pola súa traxectoria na defensa e divulgación da lingua, música, baile e tradicións galegas.
Máis dun cento de artistas participan en 'As Cigarreiras', que combina música sinfónica, canto coral, teatro e danza. A proposta reúne sobre o escenario á Banda Municipal, o Coro Galego Cántigas da Terra e o Grupo de Baile Santaia, ademais dun elenco interpretativo encabezado pola actriz Isabel Risco.
A obra recupera e actualiza o xénero da estampa galega para render homenaxe ás mulleres que protagonizaron a revolta do 7 de decembro de 1857, un episodio clave na historia social e laboral da cidade e do movemento obreiro.
A alcaldesa concluíu afirmando que "A Coruña é unha cidade con talento, creatividade e unha rica tradición cultural. Proxectos como As Cigarreiras son a mellor demostración da capacidade das nosas entidades e profesionais para crear propostas innovadoras a partir do noso patrimonio e da nosa historia".
Os convites para o espectáculo do Palacio da Ópera estarán dispoñibles a partir das 13.00 horas deste martes 20 de outubro en Ataquilla e no despacho de billetes da praza de Ourense. Cada persoa pode retirar ata catro convites.
