Unha publicación científica internacional, liderada pola investigadora do Centro Interdisciplinar de Química e Bioloxía (CICA) da Universidade da Coruña, Cristina Piñeiro-Corbeira, establece as accións prioritarias para a conservación e restauración dos bosques de kelp en Europa. Estes ecosistemas mariños, formados por grandes algas pardas, son vitais pola súa biodiversidade, captura de carbono e protección costeira, pero atópanse ameazados polo quecemento oceánico e outras presións humanas.
O traballo, publicado en “Annals of Botany” e no que tamén participa o investigador do CICA Rodolfo Barreiro, analiza como o novo “Regulamento Europeo de Restauración da Natureza” pode ser unha ferramenta para reverter o deterioro destes hábitats. Propón medidas como a elaboración de mapas de alta resolución, a unificación de sistemas de seguimento entre países europeos, a identificación de zonas prioritarias para a restauración e o establecemento de indicadores comúns.
Segundo os autores, estas estratexias permitirán converter a normativa europea en actuacións concretas para recuperar ecosistemas fundamentais para a biodiversidade, a mitigación do cambio climático e a sustentabilidade das comunidades costeiras. A investigación tamén subliña o papel do CICA e da Universidade da Coruña como referentes internacionais na investigación mariña.
O CICA, creado en 2015, é un centro de investigación de ciencias avanzadas con máis de 200 investigadores en Biomedicina, Alimentación, Contaminación e Saúde, e Nanociencia e Materiais Avanzados. Conta co recoñecemento CIGUS da Xunta de Galicia e destaca pola atracción de talento e a promoción da igualdade de xénero, cunha presenza feminina superior ao 50%.
