Un equipo da Universidade de California en Davis, nos Estados Unidos, desenvolveu unha interface cerebro-ordenador (BCI) que devolve a capacidade de comunicación e acceso dixital a persoas con esclerose lateral amiotrófica (ELA) que perderon a fala. O sistema, implantado no cerebro, traduce a actividade neuronal asociada ao intento de falar en texto e control do cursor do ordenador.
Durante case dous anos, o paciente utilizou a interface de forma autónoma e estable no seu fogar, acumulando máis de 3.800 horas de uso. Xerou 183.060 frases e case dous millóns de palabras, cunha velocidade media de 56 palabras por minuto. A precisión do sistema acadou máis do 99% nun vocabulario de 125.000 termos, e no uso cotián, o 92% das frases foron precisas.
Grazas a esta tecnoloxía, o participante puido enviar mensaxes, escribir correos electrónicos, navegar por Internet e comunicarse con familiares e compañeiros. O estudo, publicado na revista Nature Medicine, destaca que o sistema permitiu ao paciente manter unha xornada laboral completa, conservando o seu emprego durante o período de seguimento.
Aínda que o sistema require conexións por cable e unha preparación diaria por parte de coidadores, os investigadores subliñan a estabilidade neuronal mantida durante 19 meses e as melloras nos algoritmos de aprendizaxe automático. Estes avances foron cruciais para reducir calibracións e permitir o uso independente na casa, abrindo unha vía esperanzadora para persoas con parálise grave e trastornos severos da fala.
