O Colexio Oficial de Enxeñeiros Industriais de Galicia (ICOIIG) urxe a acelerar a implantación do ancho ferroviario internacional en Santiago de Compostela, coa vista posta na súa posterior extensión cara a A Coruña e Vigo. A entidade considera esta adaptación da rede ferroviaria como un paso fundamental para mellorar a conexión de Galicia cos principais eixes europeos, tanto para o transporte de mercadorías como de pasaxeiros.
O colectivo profesional subliña que a interoperabilidade ferroviaria debe ser unha prioridade na planificación de infraestruturas, xa que ten un impacto directo na actividade industrial, nos custos loxísticos e na competitividade das empresas, portos e operadores galegos á hora de acceder aos corredores europeos.
Segundo o ICOIIG, manter unha parte significativa da rede en ancho ibérico supón unha "barreira técnica" que dificulta a plena interoperabilidade coa rede europea e limita o potencial de crecemento do transporte ferroviario na comunidade.
Os enxeñeiros industriais propoñen como primeira actuación a conversión do tramo Ourense-Santiago ao ancho internacional, para despois planificar a continuidade cara a A Coruña e Vigo a través do Eixe Atlántico. O obxectivo é evitar que as diferenzas técnicas da rede galega se convirta nun obstáculo para os tráficos ferroviarios con Europa.
O Colexio recalca que esta cuestión vai máis aló dos tempos de viaxe, vinculándoa á capacidade da economía galega para atraer novas operacións ferroviarias e reducir a dependencia doutros modos de transporte. A interoperabilidade, sinalan, é unha "infraestrutura crítica" para a competitividade industrial, a captación de operadores, a redución de custos loxísticos e a descarbonización do transporte.
A organización advirte de que un atraso na transición cara ao ancho internacional podería "consolidar unha posición periférica" de Galicia na Rede Transeuropea de Transporte, nun momento en que a UE está a potenciar corredores ferroviarios de mercadorías interoperables. A adaptación do ancho ferroviario é vista como unha ferramenta clave para a competitividade económica, a planificación loxística e o avance na redución de emisións.
