A cita, que busca consolidarse como un gran punto de encontro do motor galego, contará coa presenza de figuras de renome internacional como o sueco Stig Blomqvist, campión do mundo en 1984; o italiano Massimo “Miki” Biasion, bicampión mundial en 1988 e 1989; o noruegués Petter Solberg, campión en 2003 e tamén de rallycross; e o copiloto coruñés Luis Moya, bicampión mundial xunto a Carlos Sainz.
O evento, pensado para todos os públicos, combina competición, espectáculo e actividades familiares. Tras o éxito da primeira edición, que atraeu a máis de 4.000 afeccionados, este ano aposta por un cartel de luxo para dar un salto cualitativo.
Ademais das estrelas internacionais, o rallyshow contará coa participación de pilotos galegos confirmados como Alberto Meira, Jorge Pérez, Antón Pérez, Daniel Berdomás e o local Iago Gaberias, quen estreará un novo vehículo. Os participantes loitarán pola vitoria nun circuíto que promete emoción.
A Festa do Motor non se limitará ao rallyshow, xa que tamén incluirá exhibicións de drift e carcross, unha exposición de vehículos, simuladores, unha zona infantil e un circuíto para os máis pequenos. Haberá tamén pantallas xigantes para seguir toda a acción.
