A delegada da Xunta na Coruña, Belén do Campo, xunto á directora territorial da Consellería de Política Social, María Blanco, visitou a primeira fase de preparación do taller interxeracional Anaquiños de Saber, que se desenvolve no centro sociocomunitario da Coruña. Esta iniciativa enmárcase no programa de envellecemento activo da Consellería de Política Social e Igualdade.
O proxecto reunirá as persoas usuarias deste centro cos menores residentes no centro de atención a menores San Xosé de Calasanz co obxectivo de favorecer a aprendizaxe mutua e transmitir ás novas xeracións os coñecementos, as experiencias e as tradicións das persoas maiores.
Belén do Campo salientou que proxectos como Anaquiños de Saber permiten recoñecer o valor da experiencia acumulada ao longo da vida e convertela nunha ferramenta de aprendizaxe para nenos, nenas e adolescentes. O proxecto busca recuperar pequenos saberes para transformalos en talleres creativos dirixidos aos menores, transmitindo coñecementos sobre costumes, lingua, oficios e tradicións.
A iniciativa estrutúrase en dúas fases. A primeira, que se desenvolve entre outubro e decembro de 2026, céntrase na identificación das capacidades e coñecementos das persoas maiores e na preparación dos materiais. A segunda fase comezará en febreiro de 2027 coa posta en práctica dos talleres, onde as persoas maiores asumirán o papel de profesores.
A delegada subliñou que este modelo de traballo favorece un intercambio onde todas as persoas participantes teñen algo que achegar e aprender, mentres os menores descobren coñecementos e tradicións e as persoas maiores atopan novos espazos de participación e recoñecemento social.
