O torneo, que se celebra por primeira vez cunha sede única, rende homenaxe a David Eiroa, falecido en 2022, quen tivo unha forte vinculación co fútbol dende moi novo e consideraba este deporte unha forma de entender a vida, gozar e compartir cos amigos.
Participarán nesta edición equipos como Bertamiráns F. C., Racing de Ferrol, Victoria C. F., R. C. Celta de Vigo, Montañeros C. F., C. D. Calasanz, Ural F. C., R. C. Deportivo de A Coruña, E. D. Xuventude Oroso, Atlético C. Arteixo, Pabellón C. F. de Ourense e S. D. Conxo. Os dous últimos son as novidades deste ano.
A historia do Memorial David Eiroa comezou en 2023 cun triangular entre Deportivo, Calasanz e Montañeros, tres clubs nos que militou David. Na segunda edición, en 2024, o torneo ampliouse a seis equipos e incorporou eliminatorias, duplicándose o número de participantes nas seguintes edicións ata chegar aos doce conxuntos actuais.
A presente edición inclúe un spot realizado polo director Mateo García Barreiro, cofundador do Colectivo Ánimas, que pon o foco no valor do deporte e na súa capacidade para crear comunidade.
Esta iniciativa é da Asociación David Eiroa, organizada xunto ao Atlético Club Arteixo, co apoio do Concello de Arteixo e a colaboración de Gadis. Nos anos anteriores, o torneo foi patrocinado por Atmósfera Sport, acordo que se mantén a través da Fundación Tabe.
