O Centro de Investigación en Tecnologías de la Información y las Comunicaciones (CITIC) da Universidade da Coruña (UDC) deu un paso adiante na República Checa co proxecto europeo EDIGIT (Education and Digital Literacy to Grow Inclusive Talents). O encontro internacional, celebrado en Praga os días 23 e 24 de setembro, centrouse no desenvolvemento de competencias dixitais e na integración da inclusión e accesibilidade na educación STEM (Science, Technology, Engineering and Mathematics).
A iniciativa EDIGIT, enmarcada no programa Erasmus+, traslada a escala internacional a experiencia acumulada polo CITIC co proxecto Talentos Inclusivos. Representantes do CITIC, como Javier Pereira e Irene Brage, xunto a docentes de centros educativos vinculados a Talentos Inclusivos, participaron na reunión para achegar a perspectiva dos centros educativos que xa traballan con metodoloxías colaborativas.
O encontro permitiu realizar un seguimento conxunto da evolución de EDIGIT e concretar o paso cara a unha nova fase centrada na validación dos materiais e nas probas piloto da plataforma formativa. Ademais, presentouse a proposta inicial para as sesións de “Formación de Formadores”, que terán lugar na Coruña en 2027, combinando contidos teóricos con actividades prácticas de cocreación inclusiva.
A xuntanza tamén incluíu unha visita ao Gymnázium Jiřího Gutha-Jarkovského (GJGJ) de Praga, entidade socia e anfitrioa, para coñecer a súa experiencia educativa e fomentar o intercambio de boas prácticas. Este encontro marca o paso de EDIGIT da creación de contidos á súa validación e aplicación práctica, co obxectivo de converter os resultados en recursos transferibles a outros centros educativos.
O proxecto Talentos Inclusivos, desenvolvido polo CITIC e ASPACE Coruña co apoio de diversas institucións galegas e a FECYT, busca espertar vocacións STEM entre a xuventude e dar a coñecer a realidade da discapacidade mediante a creación de solucións tecnolóxicas a retos formulados por persoas con parálise cerebral.
