O CITIC da Universidade da Coruña estivo presente nas II Xornadas de Bibliotecas Municipais da provincia da Coruña, organizadas pola Biblioteca Provincial da Deputación da Coruña baixo o título «Novas tecnoloxías nas bibliotecas: retos, riscos e oportunidades». O encontro reuniu a profesionais e especialistas para reflexionar sobre os cambios que a transformación tecnolóxica está a introducir no ámbito bibliotecario e cultural.
Un dos eixos centrais da xornada foi o análise das posibilidades e os desafíos que expón a intelixencia artificial. O CITIC estivo representado polo seu investigador David Vilares Calvo, profesor da UDC, quen participou na sesión «A IA e as súas posibilidades nas bibliotecas». Nesta mesa tamén interviron Enrique Calvo, xefe da División Xurídica da Axencia Española de Supervisión da Intelixencia Artificial (AESIA), e Adina Vladu, investigadora do Instituto da Lingua Galega. A sesión, moderada por Leticia Chas, permitiu achegar diferentes perspectivas sobre a incorporación destas tecnoloxías aos servizos bibliotecarios.
Durante o encontro analizouse como a intelixencia artificial está a transformar os procesos de busca, tratamento e acceso á información, así como as oportunidades para mellorar os servizos e a relación coas persoas usuarias. Tamén se abordaron cuestións como a fiabilidade da información, os sesgos algorítmicos, a protección de datos e a necesidade de desenvolver competencias dixitais.
A participación de David Vilares Calvo permitiu incorporar ao debate o coñecemento científico xerado no CITIC e achegar a perspectiva da investigación universitaria a un ámbito fundamental para a democratización da cultura e o coñecemento.
O programa incluíu outras intervencións centradas nas aplicacións das novas tecnoloxías. Carlota Neira abordou o uso das redes sociais como ferramenta de promoción, mentres que o xornalista Manuel Gago explorou as posibilidades da intelixencia artificial nas bibliotecas rurais. Pola súa banda, María Lema, responsable do servizo eBiblio da Deputación, presentou esta plataforma de lectura dixital. Na sesión de tarde, Laura Castro Souto, vicerreitora de Estratexia Dixital da UDC, profundou nas ferramentas de intelixencia artificial xerativa aplicadas ao traballo bibliotecario. A xornada concluíu cun bloque sobre dinamización literaria e clubs de lectura, no que participaron as escritoras Antía Yáñez e Marta Villar.




