O Concello da Coruña deu luz verde hoxe, en Xunta de Goberno Local, á licitación da concesión dos servizos de explotación, xestión e mantemento do Campo Municipal de Golf da Torre de Hércules. O prazo de duración será de 15 anos, sen opción a prórroga.
A alcaldesa, Inés Rey, destacou que o obxectivo é "fortalecer e ampliar os servizos ofrecidos por unhas instalacións deportivas que contan cunha forte demanda", e anunciou un paso á fronte para "mellorar e traer novos investimentos a este campo".
O contrato, cun valor estimado de 9.207.850,96 €, abrange a xestión deportiva, administrativa e económica da instalación, así como a conservación de infraestruturas, equipamentos e zonas verdes. Prevé actuacións como a remodelación do campo de xogo, a renovación de "greens" e "boxes", a modernización do edificio principal con melloras de accesibilidade e eficiencia enerxética, a substitución da iluminación por tecnoloxía LED, a renovación de maquinaria e a construción dun novo almacén.
Esta licitación abre unha nova etapa orientada á modernización, á mellora da calidade do servizo e á sostibilidade económica e ambiental. Establécese un prazo máximo de 18 meses para a execución das principais actuacións de investimento inicial.
Inés Rey subliñou a importancia estratéxica da instalación, situada ao carón da Torre de Hércules, e o desexo de que sexa "un espazo aberto á cidadanía, no que calquera persoa poida achegarse ao golf e iniciarse neste deporte". Tamén se potenciarán os cursos da Escola Municipal de Golf e facilitarase a práctica a nenos, adultos e maiores a prezos accesibles.
A concesión prevé un investimento estimado de máis de 1 millón de euros por parte da adxudicataria para a modernización. O Concello tamén incorporará criterios sociais nas contratacións públicas, promovendo mellores condicións laborais para o persoal.
O Campo Municipal de Golf Torre de Hércules busca reforzar a súa oferta deportiva, formativa e turística, achegando o golf á cidadanía de forma accesible.
Por outra banda, o Concello tamén acordou a prórroga dos lotes 1, 2, 3 e 4 do servizo de conservación, mantemento e mellora dos parques e xardíns da cidade, cun investimento municipal de máis de 8,3 millóns de euros anuais. Inés Rey destacou o "bo desempeño do servizo" que garante o bo funcionamento dunha "actividade municipal esencial".
Os catro lotes prorrogados cobren a xestión das áreas verdes da cidade, incluíndo parques, zonas forestais, ecohortas e accesos a praias e ríos. O servizo tamén inclúe o inventario do arboredo e o seguimento do mobiliario urbano en diversos enclaves da cidade.
