O proxecto contempla a habilitación de novas áreas de xogo con diversidade de oferta lúdica para nenos e nenas, incluíndo zonas con árbores para xerar sombra. Esta intervención forma parte da estratexia municipal para a mellora e ampliación das zonas de xogo e de lecer infantil, así como o reforzo das instalacións públicas para a práctica deportiva ao aire libre.
A intervención dotará ao parque dunha pista multideporte con céspede artificial e valado de protección de 4,5 metros de alto. Tamén se incluirán novas zonas biosaudables con equipamento como bancos de abdominais, bicicletas elípticas e zonas de estiramento.
“"Visma é unha zona en eclosión nesta cidade. Nun futuro xa moi próximo miles de novas familias chegarán a esta área grazas aos proxectos de desenvolvemento urbanístico en marcha. Por iso, este Concello está a pór todos os esforzos en reforzar os servizos e os equipamentos, e iso inclúe, por suposto, o esparexemento de persoas de todas as idades, para que a cidadanía poida facer vida no seu propio barrio poñemos todos os recursos ao noso alcance."
Ademais, crearase unha área de xogo infantil baseada na integración de xogos habituais con xogos accesibles e adaptados para nenos e nenas con discapacidade, como unha randeeira-cesta. Reforzarase a iluminación do perímetro e dotarase ao complexo dunha nova fonte de auga e mobiliario. A obra afectará a unha superficie de máis de 800 metros cadrados, incorporando elementos como unha estrutura en forma de avión e outra de superación de obstáculos.
