A institución provincial contará cunha programación propia para dar a coñecer o traballo de creadoras e creadores da provincia e visibilizar algúns dos seus premios literarios e musicais. A deputada de Cultura, Natividade González, participou na presentación oficial do festival, que reunirá máis de 800 artistas e creadores galegos con preto de 200 espectáculos e actividades.
González destacou o significado da feira para a cultura galega e o orgullo da Deputación da Coruña por formar parte dela. "Desde a Deputación seguimos colaborando cunha programación que nos permite traer a este espazo unha boa representación do traballo cultural que se desenvolve na nosa provincia", sinalou, poñendo en valor o talento galego.
A deputada tamén reivindicou Culturgal como un espazo de encontro e construción colectiva. "Aquí non só se presentan libros, espectáculos ou proxectos culturais. Aquí atopámonos, compartimos, coñecemos o que están facendo outras persoas e, sobre todo, seguimos construíndo cultura colectiva", engadiu.
A programación da Deputación da Coruña centrarase en propostas musicais e literarias. O sábado 28 de novembro, ás 13.00 horas, actuará Raposa, gañadora dos Premios NARF 2026. Pola tarde, ás 18.00 horas, celebrarase o encontro «Premios que tecen redes: Certames Literarios da Deputación da Coruña», coa participación de Manuel Barreiro e Elías Taño para presentar Maré, gañadora do Premio Castelao de Banda Deseñada, seguido dunha sinatura de exemplares.
O domingo 29 de novembro, ás 16.00 horas, Antía Yáñez, gañadora do Premio Raíña Lupa de Literatura Infantil e Xuvenil 2025, presentará Bragakadabra nunha conversa con Lois Pérez, gañador na edición de 2022. O encontro tamén lembrará a Agustín Fernández Paz, gañador da primeira edición en 1998. A xornalista Susana Pedreira conducirá ambas as conversas.
A programación pecharase o domingo ás 17.00 horas cun concerto das bandas e proxectos gañadores do concurso musical infantil Quero Cantar no 2026, iniciativa para fomentar a creación musical entre a infancia e a mocidade.
