O presidente provincial, Valentín González Formoso, e o alcalde do Pino, Manuel Taboada, asinaron hoxe o convenio de cooperación para cofinanciar estas obras. A achega provincial supón o 80% do orzamento total, fixado en 118.158,35 euros, mentres que o 20% restante será asumido polo Concello do Pino.
O proxecto contempla a execución dun itinerario peonil de 540 metros de lonxitude e 1,8 metros de ancho, con pavimento de aglomerado en quente e delimitado por bordos de formigón. Na zona de entronque co Camiño de Santiago, a senda contará cun acabado específico en formigón desactivado para integrala na contorna.
Os traballos inclúen tamén a instalación dunha nova rede de recollida de augas pluviais con 540 metros de tubaxe, 14 pozos de rexistro e 16 arquetas, así como a construción dun muro de contención de formigón de dez metros e o acondicionamento do firme dos viarios lindeiros. O prazo estimado para a execución completa é de seis meses a partir da súa adxudicación.
O obxectivo é garantir desprazamentos seguros para a veciñanza e reforzar a accesibilidade das conexións internas do municipio.
