As asociacións e fundacións culturais da provincia poderán solicitar axudas para o desenvolvemento de actividades e para a realización de investimentos culturais desde o 20 de novembro ata o 18 de decembro de 2026. A Deputación da Coruña publicou hoxe no Boletín Oficial da Provincia (BOP) a convocatoria de dous programas de subvencións.
A primeira liña de subvencións conta cun orzamento de 1.200.000 euros para apoiar proxectos e actividades culturais, con contías por entidade de entre 3.000 e 30.000 euros. A segunda liña dispón de 525.000 euros para investimentos culturais, dirixida a asociacións, fundacións e titulares de museos, centros de interpretación ou bibliotecas con domicilio fiscal na provincia, con axudas de entre 3.000 e 15.000 euros.
A deputada de Cultura, Natividade González, destacou que estas convocatorias buscan “manter vivo o tecido asociativo da provincia” e confirmou o “compromiso da Deputación coa cultura de base”.
O prazo de presentación de solicitudes abrirase ás 08:00 horas do 20 de novembro de 2026 e finalizará ás 14:00 horas do 18 de decembro de 2026. A tramitación será obrigatoriamente telemática a través da sede electrónica da Deputación.
