O Concello de Culleredo deu a coñecer a licitación dun conxunto de actuacións destinadas á modernización viaria do municipio. As intervencións concentraranse en 14 puntos de varias parroquias do contorno rural e suporán un investimento superior aos 550.000 euros, cofinanciados pola Deputación da Coruña a través do Plan Único.
O primeiro bloque de actuacións, cun orzamento de 424.500 euros, centrarase na mellora de 13 vías rurais para impulsar unha conexión segura de norte a sur, conectando os núcleos de Tarrío e Celas a través das parroquias de Sésamo e Sueiro. Inclúense rúas como As Reixas, Seara, Cillobre, Cangas, Cornedo, Campo da Fonte, Agra do Casal e Condes, ademais de estradas e enlaces clave.
Os traballos nestas vías consistirán na mellora do pavimento e da drenaxe, limpeza e adecuación de marxes, dotación de sinalización, instalación de redutores de velocidade e o recrecido de tapas de rexistro. O obxectivo é ofrecer unha alternativa máis segura ás grandes vías de comunicación, moi utilizadas polos residentes.
O segundo proxecto, dotado con 126.400 euros, executarase na contorna da Casa do Concello en Tarrío, complementando unha reforma viaria xa realizada pola Deputación. A intervención abranguerá as rúas Constitución e Viouteiro, unha zona residencial e de servizos que rodea a praza, o consultorio médico, o consistorio e a igrexa.
Nesta área mellorarase a seguridade viaria priorizando ao peón, dotarase de novo pavimento e mobiliario urbano, e optimizaranse as canalizacións de servizos. Crearase unha plataforma única de pedra e formigón desactivado para mellorar a ordenación do espazo e a accesibilidade, especialmente na rúa Viouteiro coa creación dunha nova beirarrúa.
A obra completarase coa renovación das redes de pluviais e alumeado, a instalación de novo mobiliario urbano como bancos e papeleiras, a reposición do peche do parque e a plantación de carballos.
