A Universidade da Coruña participou esta mañá na reunión constitutiva do grupo de traballo encargado de deseñar o vindeiro Plan de Financiamento Universitario de Galicia para o período 2028-2032. Este documento establecerá a estratexia de financiamento do Sistema Universitario de Galicia (SUG) para os próximos anos, sucedendo ao plan actual que remata en 2026 e foi prorrogado para 2027.
Na xuntanza estiveron presentes, en representación da UDC, o reitor, Ricardo Cao, e o vicerreitor de Economía e Planificación Estratéxica, Ángel Fernández. Tamén asistiron representantes da Xunta de Galicia e das universidades de Santiago de Compostela e Vigo.
Segundo informou a Consellería de Educación, Ciencia, Universidades e Formación Profesional, a elaboración do novo plan estenderase durante o resto de 2026 e os primeiros meses de 2027. O obxectivo principal é establecer un novo marco de financiamento que asegure a estabilidade e a planificación económica das universidades públicas galegas para o período 2028-2032.
O futuro documento manterá a estrutura do plan vixente e integrará as novidades introducidas no SUG nos últimos anos, como a matrícula universitaria gratuíta, a Fundación Galtia e as novas esixencias do programa estatal María Goyri.
As universidades deberán achegar nos próximos meses información sobre planificación de xubilacións, necesidades docentes, plans de investigación e indicadores de contabilidade analítica, entre outros datos que servirán de base para o cálculo do financiamento do sistema.
