O Concello da Coruña avanza na organización de Chorus 2027, a segunda edición do seu proxecto educativo e musical, que se celebrará o 10 de xaneiro de 2027 no Coliseum. A iniciativa xa conta con 394 escolares inscritos, 150 máis que na súa primeira edición.
A pasada fin de semana tivo lugar no Conservatorio Profesional de Música da Coruña a segunda xornada de ensaios, coa participación de alumnado e profesorado de diversos centros educativos da cidade e arredores, como os CEIP Eusebio da Guarda, San Pedro de Visma, Luis Seoane, María Barbeito e Prácticas; os CPR Sagrado Corazón-Franciscanas e Compañía de María; e os IES Afonso X o Sabio, Salvador de Madariaga, Fernando Wirtz, David Buján de Cambre e María Casares de Oleiros.
O aumento da participación confirma a boa acollida dun proxecto que na súa primeira edición reuniu máis de 630 voces, converténdose nun referente cultural e educativo na cidade.
“"Chorus naceu coa vocación de ser un proxecto de cidade e comprobar que cada vez son máis os centros e máis os escolares que queren formar parte desta experiencia é a mellor demostración de que estamos no bo camiño. A música é unha ferramenta extraordinaria para educar, para crear comunidade e para transmitir valores."
A alcaldesa da Coruña, Inés Rey, destacou que os datos de inscrición reflicten a consolidación do proxecto. Lembrou que na primeira edición participaron agrupacións como a Orquestra Sinfónica de Galicia, a Orquestra Xove, o Coro Xove da OSG, o Conservatorio Profesional de Música da Coruña, o Coro MiniGaos, o Coro Gaos Novo e o Coro Gaos, ademais de artistas como Rosa Cedrón, Carolina Rubirosa, Gandy, Carlos Tojeiro, Eva B e Tinho.
Rey subliñou que Chorus vai máis alá dun concerto, xa que a través do canto coral, os nenos e nenas aprenden a escoitar, cooperar e a comprender o valor de cada voz. Os ensaios continuarán nas próximas semanas e proximamente darase a coñecer a data de recollida de convites e máis información sobre o concerto.
