Cada concello ten a potestade de propoñer dous festivos de carácter local ao ano. De cara á elaboración do calendario laboral para 2027, a Corporación municipal de Cambre xa acordou que un deses festivos sexa o 24 de xuño, día de San Xoán.
Co obxectivo de coñecer a opinión da cidadanía sobre a elección do segundo día festivo, o Concello abriu unha consulta pública. As opcións que se presentan son o 9 de febreiro de 2027, que coincide co Martes de Entroido, e o 16 de agosto de 2027, festividade de San Roque.
Esta enquisa participativa, que non ten carácter vinculante, permanecerá aberta ata o vindeiro luns 10 de agosto ás 10:00 horas. O resultado servirá como referencia para a decisión final da Corporación municipal e para a tramitación dos festivos locais correspondentes ao ano 2027.
Que data prefires como segundo festivo local de Cambre en 2027?
