A Biblioteca Provincial da Coruña súmase á celebración do Día das Bibliotecas co lema "Sen profesionais non hai bibliotecas", recoñecendo a traxectoria de Bernardo Barreiro de Vázquez Varela (Santiago de Compostela, 20 de xaneiro de 1850 - A Coruña, 27 de novembro de 1904).
Bernardo Barreiro, que tamén foi arquiveiro, historiador, xornalista e escritor, tivo unha destacada carreira profesional. Foi redactor de La Ilustración Gallega y Asturiana, arquiveiro do Concello de Santiago de Compostela e fundador e director de Galicia diplomática (1882-1893).
En 1888, por oposición, gañou o posto de Oficial Bibliotecario-arquiveiro da Deputación da Coruña, cargo que desempeñou ata a súa morte en 1904. Durante o seu mandato, realizou o Catálogo por orde alfabética de autores de las obras que existen en la Biblioteca de la Diputación Provincial de La Coruña (1893), unha obra considerada relevante pola súa achega á historia da institución.
A proposta para a súa designación como responsable da "refundada" Biblioteca Provincial foi aprobada pola Deputación da Coruña o 10 de novembro de 1881, a instancias do deputado Maximiliano Linares Rivas.
