Os tres Museos Científicos da Coruña (Aquarium Finisterrae, Casa das Ciencias e Domus) rematarán a súa xornada de actividade ás 18.00 horas o vindeiro mércores 12 de agosto, dúas horas antes do habitual na tempada de verán.
Esta decisión municipal prodúcese ante a previsión de que milleiros de persoas saian ás rúas da cidade para contemplar a eclipse solar, cuxa fase de totalidade se vivirá entre a tarde e a noite. A eclipse poderá verse a partir das 19.30 horas e finalizará ás 21.22 horas, alcanzando a totalidade ás 20.28 horas cunha duración aproximada de 76 segundos.
Os últimos accesos ao Aquarium Finisterrae autorizaranse ás 17.00 horas, mentres que na Casa das Ciencias e na Domus será ás 17.30 horas. O peche das tres instalacións será, polo tanto, hora e media antes do inicio do fenómeno.
A eclipse non será visible dende a Casa das Ciencias debido á súa ubicación no parque de Santa Margarida, rodeada de árbores e edificios. Si será posible observala dende o aparcadoiro exterior do Aquarium Finisterrae e, preto da Domus, na contorna das Lagoas, no paseo.
“"A Coruña terá o privilexio de formar parte das cidades europeas mellor posicionadas para vivir un evento tan singular, que está a atraer a persoas de moitas partes do mundo e que, tanto en termos de divulgación científica como de impacto socioeconómico, será moi positivo."
O concelleiro de Cultura e Turismo, Gonzalo Castro, subliñou que a cidade terá o privilexio de formar parte das cidades europeas mellor posicionadas para vivir este evento, que atraerá a persoas de moitas partes do mundo e que será moi positivo tanto en termos de divulgación científica como de impacto socioeconómico.
Castro lembrou que o Concello leva meses traballando para incentivar a visualización da eclipse dende puntos definidos e abertos á cidadanía a través dun mapa interactivo dispoñible na web municipal.
