A delegada da Xunta na Coruña, Belén do Campo, xunto á directora territorial da Consellería de Sanidade, Cristina Pérez, participaron hoxe no acto de presentación do autobús solidario da Fundación Mapfre “Cambia o Filtro”. Esta iniciativa ten como obxectivo sensibilizar á cidadanía sobre a realidade das persoas con discapacidade intelectual e con enfermidades raras e contribuír a derrubar prexuízos e eliminar barreiras.
Belén do Campo agradeceu á Fundación a posta en marcha desta campaña e destacou a importancia de “cambiar a mirada” coa que a sociedade se achega a estas persoas, sinalando que “detrás dunha discapacidade ou dunha enfermidade rara hai unha persoa, con capacidades, proxectos, dereitos e moito que achegar á sociedade”.
A representante do Goberno autonómico valorou que A Coruña sexa a única parada en Galicia deste autobús, que permanecerá dous días na cidade: hoxe no Parrote e mañá martes na zona de Catro Camiños. A cidadanía poderá acceder de maneira gratuíta á unidade móbil para coñecer historias reais e achegarse ao traballo das entidades sociais que acompañan ás persoas e familias.
Do Campo salientou tamén a elección de Fegerec como entidade colaboradora, valorando o seu traballo na Coruña e na comunidade. Destacou que a Federación Galega de Enfermidades Raras e Crónicas ofrece atención sociosanitaria, apoio, orientación e servizos de rehabilitación e intervención a persoas con enfermidades raras e as súas familias.
A representante do Goberno galego referiuse ao novo centro de atención integral de FEGEREC na Coruña, cedido pola Xunta, que permite á entidade ampliar e mellorar a súa atención. Lembrou que no ano 2026 a Consellería de Política Social mantén un convenio de máis de 33.000 euros con Fegerec, e que a entidade conta con 263.000 euros das axudas do 0,7 % do IRPF.
Ademais, a Consellería de Sanidade mantén con Fegerec un convenio de 250.000 euros para un proxecto pioneiro de rehabilitación funcional domiciliaria para pacientes pediátricos con enfermidades raras, que beneficiará a preto de 100 pacientes ao longo deste ano.
Belén do Campo subliñou que estes apoios exemplifican como a colaboración entre a Administración e as entidades sociais avanza cara a modelos de atención “máis próximos, máis individualizados e centrados nas necesidades concretas de cada persoa e de cada familia”.
A delegada puxo o foco na importancia de que a inclusión se traslade aos centros educativos, empresas, administracións, espazos públicos e á vida cotiá.
Finalmente, felicitou á Fundación Mapfre e a Fegerec pola iniciativa e animou á cidadanía da Coruña a achegarse ao Parrote e á zona de Catro Camiños para coñecer a campaña e o labor das entidades.
