A Rede de Bibliotecas Municipais da Coruña acollerá un ambicioso programa de dinamización lectora dirixido a familias, que inclúe 104 actividades e conta cun investimento de máis de 100.000 euros. O obxectivo é converter as bibliotecas en espazos de descubrimento, participación e goce da lectura en compañía, especialmente para a infancia.
Un dos programas máis consolidados é 'Merendas con contos', que celebra 32 anos achegando a lectura a nenos e nenas de 3 a 7 anos e ás súas familias. Esta iniciativa utiliza os contos, a narración oral e a representación escénica como ferramentas lúdicas e participativas para fomentar o achegamento aos libros desde idades temperás.
Nesta edición, ofreceranse máis de 2.600 prazas para crianzas de 3 a 7 anos, cunha programación que se estenderá de outubro a maio. As actividades combinarán diversas disciplinas como contos, narración oral, música e representación escénica, adaptadas ás diferentes idades e necesidades dos participantes.
O concelleiro de Cultura e Turismo, Gonzalo Castro, sinalou que "queremos que as nenas e os nenos descubran desde as primeiras idades que na biblioteca sempre hai unha historia esperando por eles, pero tamén que as familias atopen nestes espazos un lugar para tempo, descubrir libros e gozar xuntas da lectura". Engadiu que "programas como 'Merendas con Contos', que leva 32 anos achegando os contos ás crianzas da cidade, axúdannos precisamente a crear ese vínculo coa biblioteca e coa lectura desde os primeiros anos". O Goberno de Inés Rey comprometeuse a seguir impulsando investimentos deste tipo para reforzar a rede de bibliotecas públicas.
As propostas buscarán a participación activa das crianzas e das familias, promovendo a diversidade e a inclusión. Priorizaranse libros do catálogo municipal para facilitar o préstamo e a continuidade das historias na casa. Ademais, porase en valor a tradición oral galega e fomentaranse espazos de comunicación arredor dos libros.
As actividades terán unha duración de 45 minutos e desenvolveranse de luns a sábado, de 18:00 a 18:45 horas, en oito espazos da rede: Biblioteca Ágora (luns, 30 prazas), Biblioteca Sagrada Familia (martes, 20 prazas), Biblioteca Fórum Metropolitano (martes, 30 prazas), Biblioteca Monte Alto (mércores, 25 prazas), Biblioteca Castrillón (xoves, 30 prazas), Biblioteca Rosales (venres, 16 prazas), Punto de Préstamo de Mesoiro (sábado, 30 prazas) e Biblioteca Durán Loriga (sábado, 20 prazas). Os horarios e datas definitivas poderán sufrir modificacións.
Esta iniciativa forma parte da aposta do Concello da Coruña por promover a lectura e consolidar as bibliotecas como espazos accesibles e de encontro para toda a cidadanía.
